Natalana na nga ipanagtag sa Abril 9 ang fuel subsidy coupon para sa 1, 600 Public Utility Jeepney drivers and operators sa syudad sang Iloilo halin sa City Government.
Sa Abril 11 kag Abril 12, natalana naman ang pag-claim kag pagpatughong sang mga PUJ drivers sang ila mga salakyan.
Sa interview sang Bombo Radyo kay Joy Fantilaga-Gorzal, Spokesperson ni Mayor Raisa Treñas, iya ginpahayag nga sa adlaw sang pagpatughong, kinahanglan nga magdala sang original driver’s license kag isa ka photocopy sini nga may ara sang 3 ka specimen signatures.
Gin-athag man ni Gorzal nga nalakip man diri sa 1, 600 nga PUJ drivers ang mga modernized jeepneys.
Wala man ginapahanugutan sang City Government nga iban nga tawo ang magpatughong sang gatong kun sa diin dapat kun sin-o ang nakasulat nga pangalan sa coupon amo ang dapat nga mag-claim.
Samtang sa Abril 8, adlaw sang Mierkules nakatalana naman nga ipapanagtag ang cash assistance para sa 1, 983 ka mga Tricycle Operators and Drivers Association (TODA) nga nagabalor sang P5, 000 halin sa Department of Social Welfare and Development.
Kinahanglan sang mga ini nga magdala sang ila original driver’s license kag duwa ka photocopy sini nga may ara sang 3 ka original specimen signatures.
Nahibaluan nga sang nagligad nga semana natigayon na nga matagaan sang subsidiya nga gatong ang mga tricycle drivers and operators sa syudad sang Iloilo kag ini ang inisyatibo mismo sang city government.
