Gin-inagurahan na kahapon nga adlaw, Abril uno ang ika-siyam kag ikanapulo nga Iloilo City Action and Resilience (ICARE) Center sa Bankers Village IV, Jaro, kag Taal, Molo, Iloilo City.
Ini agud nga magabulig sa mas madasig kag mas epektibo nga pagresponde sa emerhensya kag kalamidad sa syudad sang Iloilo.
Sa interview sang Bombo Radyo Joy Fantilaga-Gorzal, Spokesperson ni Mayor Raisa Treñas, iya ginpahayag nga ang pasilidad nga nahamtang sa Bankers Village IV pwede na nga magamit sang City Disaster Risk Reduction and Management Office (CDRRMO), Iloilo City Police Station 3 kag Bureau of Fire Protection.
Samtang ang sa Taal Molo, Iloilo City naman ang ginkay-o na sang maayo kag pwede na nga magamit sang Molo Police Station sa pagserbisyo man sa mga pumuluyo sa nasambit nga lugar.
Nahibaluan nga ini nga mga bag-o nga center ang magadugang sa mga existing ICARE Centers sa So-oc, Ungka, Calumpang, Balantang, Tanza-Esperanza, Nabitasan, ICC Gaisano, kag Megaworld, nga nagapakita sang kooperasyon sang city government kag mga partner agencies sa paghatag sang mas safe nga Iloilo City.
Suno pa kay Gorzal nga indi na mabudlayan ang pumuluyo sa lugar bangud nga napalapit na sa mga ini ang pasilidad nga magabulig sa ila sa pag-preparar, pag-mitigate, kag pagresponde sa tion sang emerhensya.
