Nagapang-agda ang local government unit sa pagtambong kag pag-upod sa ika-50 na nga ‘Taltal sa Barotac Viejo’ sa Iloilo subong nga Byernes Santo, Abril 3.
Suno kay Barotac Viejo Mayor Nielo “Bongbong” Tupas, magasugod ang aktibidad 8:00 subong nga aga sa Barotac Viejo Municipal Gymnasium.
Magatapos ini sa Pal-ac Hills sa Poblacion kun sa diin masaksihan ang highlight sang Taltal.
Nakaalerto naman ang mga katapo sang Bureau of Fire Protection (BFP), Philippine National Police, kag Philippine Army sa pagpat-od sang seguridad kadungan sang relihiyoso nga aktibidad.
Ang “Taltal sa Barotac Viejo” amo ang live drama presentation sang kabuhi ni Hesukristo tubtub sa iya nga kamatayon.
Ini nga solemn Holy Week tradition isa ka reenactment sang kasakit, pag-antos, kag kamatayon ni Hesus kag nagapakita sang madalom nga pagtuo kag debosyon sang komunidad.#
