Pagtimalos.
Sa bata pa lamang nga edad, nagtudok na sa tagipusuon ni Erica Joy Adeva nga himuon ini ilabi na bangud sa natabo sa iya amay — ginpaarakan sang luthang, may 10 ka igu sang bala, anum sa ulo, kag apat sa lawas.
“Grabe ang akon kauhaw sa pagtimalos. Akig, dumot, kag aligutgot nga masyado ka bug-at dal-on sang bata ko nga tagipusuon ang natuga,” suno kay Erica sa iya nga repleksyon sa Siete Palabras sa Jaro Metropolitan Cathedral subong nga hapon, Abril 3.
Nagsentro ang iya testimoniya sa ika-lima nga pulong ni Kristo: “Gina-uhaw ako.”
Suno kay Erica, bangud sa kamatayon sang iya amay, nagdaku man siya nga kulang sa seguridad, may kahisa sa iban, kag kulang — indi pareho sa iban nga kabataan nga may kumpleto nga myembro sang pamilya.
Pahayag sini, may mga tion nga nagahambal ang iya iloy nga buligan siya sa pagpangamuyo nga makasulod ini sa public school agud nga makatibawas sila sa kapigaduhon.
“Sa sulod sang akon huna-huna, may pamangkot nga indi ko mapunggan. ‘Ngaa may Diyos pa haw? Kun may Diyos gid man, tani wala sang bata nga gina-uhaw sa paghigugma sang amay. Kun may Diyos gid man, tani wala sang bata nga amo sini kabug-at ang ginadala sa iya kaugalingon.'”
Apisar sini nga “kauhaw”, nakilala ni Erica ang Ang Dios Gugma Community nga amo ang nagpabalik sang iya pagpati sa Diyos. Paagi sa amo nga komunidad kag ila pagserbisyo suno kay Erica, na-islan sang pagpatawad, paglaum, kag pagpalangga ang iya ginbatyag halin sa bata nga edad.
Apang indi man mahapos ang banas para kay Erica.
Sang nakatapos na siya sa pag-eskwela kag nagaproseso na para nga makatudlo sa public school, na-diagnose man nga may breast cancer ang iya iloy.
Pahayag sini, madamo gid siya sang handum para sa iya nga iloy kag naga-amat-amat pa lang kuntani siya sa pagbawi sa mga sakripisyo sini nga ginhimo sa ila nga mag-ulutod.
“Ang kontra ko, oras. Oras nga sa paglab-ot ko sini tanan, nagasige man sa pagluya ang akon nanay bangud sa iya masakit,” suno kay Erica.
Sang ulihi, nagdangat na sa stage 4 ang cancer sang iya iloy. “Ang akon kauhaw nga ginbulong sang Ginuo sang nagligad nga mga tinuig, liwat nabuksan. Mas madalom nga kauhaw. Ang kauhaw sa purpose sang akon existence.”
Nagtaliwan ang iloy ni Erica antes pa man sini dalayon nga malab-ot ang iya mga handum.
Binulan ang nagligad, ginpatawag siya agud magproseso para nga mangin regular school teacher nga amo na kuntani ang katumanan sang iya handum.
“Sa grasya sang kaisog nga ginhatag sang Diyos, gin-waive ko ang akon item. Ginsunod ko ang singgit sang akon tagipusuon nga indi magsulod sa public school, kag padayunon ang pag-serve sa Ginuo paagi sa pagpanglakaton sa community,” panugiron sini.
Apisar wala sang palangabuhian kag apisar nga wala na sang ginikanan nga amo ang magabulig sa ila sang iya kauturan, ginpili sini ang pagsunod ang ‘calling” sa “Ang Dios Gugma Youth Ministry” sa Western Visayas. Isa ka tuig ang nagligad, nag-abot sa iya ang pribilehiyo nga makasulod sa Ang Dios Gugma Catholic School Inc. rason nga nakabalik siya sa iya propesyon nga una na sini nga ginpaiway.
“It was His redirection,” suno kay Erica. Paagi sa amo nga eskwelahan suno kay Erica, nakilala sini ang kabataan nga uhaw man sa pagpalangga, pagtatap, kag presensya sang Diyos nga sarang gid niya mabuligan.
Sa iya pagbalik sa iya mga inagyan subong nga Semana Santa, nagpahayag si Erica, “Diyos ang nakahibalo sang palaabuton nga akon ginalauman. Nahibaluan sang Diyos nga sa amo ni nga tinion, mangin ilo ako nga lubos sabagay nga ginbutang niya ako sa komunidad nga madamo ang akon instant tatay kag nanay. Instant nga mga kauturan kay Kristo nga makabulig sa journey padulong sa duog nga wala sang kauhaw kag wala sang kasakit —ang langit.”
