Naghinulsuol sa karon ang isa ka construction worker matapos nga ginsunog sini ang kaugalingon nga balay sa Brgy. Barasalon, Janiuay, Iloilo kaagahon sang Byernes Santo, Abril 3.
Isa ang napatay kag tatlo naman ang pilason sa nasambit nga insidente.
Ang suspek ginkilala kay Remos Brasileño 31-anyos.
Samtang, ang napatay naman nga bayaw sini amo si Wilgie Macero.
Ang mga na-ospital amo sanday Shiela Brasileño Macero, asawa sang napatay kag utod sang suspek kag ang duwa pa sini ka mga utod nga sanday Ivy Brasileño Perez, 35 anyos kag Richard Brasileño, 39 anyos.
Sa interview sang Bombo Radyo sa suspek, iya ginpahayag nga naglain ang ang iya buot bangud may nagapanugid sa iya asawa nga naga-inom ini sang makahulubog nga ilimnon sa iya ulubrahan kag ginapasibangdan sini ang iya utod nga nagapanugid.
Suno sa suspek, bangud sa iya kalain sang buot, gin-ula-an sini sang gas kag ginsindutan ang ila balay nga human sa ligh materials rason kun ngaa madali nga naglapta ang kalayo.
Samtang nagadako ang kalayo, natumbahan naman sang refrigerator ang bayaw sang suspek kag sa malain nga palad wala na ini nakaluwas sa sunog.
Nagpangayo ini sang kapatawaran sa Diyos kag sa iya pamilya kag handa sini nga bayran ang sala nga iya nahimo.
Nahibaluan nga nagtakas pa ang suspek matapos ang insidente apang nagdesisyon ini nga ma-surrender kahapon nga adlaw paagi kay Dr. Allen Camering, Law Enforcement Evaluation Officer II sang NAPOLCOM Region 6.
Sa interview naman sang Bombo Radyo kay PCpt Marlon Perez, hepe sang Janiuay Municipal Police Station, ginatun-an pa sang pamilya kun magapasaka sila sang kaso batok sa suspek.
