Naapresyar gid sang mga residente sang Northern Iloilo ilabi na sa banwa sang Carles, matapos nga nagselebrar kaupod sa ila si Most. Rev. Midyphil B. Billones, D.D., sang Domingo de Paskwa.
Sa interview sang Bombo Radyo kay Shirley Bensurto, Presidente sang Parish Pastoral Council sang Santa Teresa de Avila sa nasambit nga banwa, iya ginpahayag nga sya amo ang babayi nga ginatumod nga tumuluo sang arsobispo nga nagsiling nga daw kaangay nga nalimtan na sila sa Norte bangud malayo ang ila nga lugar.
Suno sa iya, ginpakigbahin nya kay Most Rev. Billones nga nagakinahanglan ang ila Parokya sang assistant Parish Priest bangud nga indi na matatapan sang isa lang ka pari ang 78 chapels sa ila Parokya ni Rev. Fr. Pope Ibañes nga nagaserbe na sa ila sang masobra tatlo ka tuig.
Ginpahayag man ni Bensurto nga madamo na nga tion nga naga-ayo sila nga mahatagan ang ila Parokya sang dugang nga pari, apang bangud sa nagagamay nga numero sang mga kaparian sa pungsod, wala sa gihapon sang nag-abot sa ila.
Dugang pa niya nga nagpalab-ot man sang pasalig si Most Rev. Billones nga pagatinguhaan sang simbahan nga mahatagan
na sila sang dugang nga pari para sa ila Parokya agud nga mapalapit pa sa mahal nga Dyos ang mga pumuluyo sang Carles.
