Desido nga magpasaka sang kaso ang pamilya sang napatay nga biktima sa suspek nga nagsungka na sang Abril 4, matapos nga hungod sini nga ginsunog ang balay nga ginatiniran sang iya man pamilya sang Abril 2.
Ginkilala ang suspek kay Remos Brasileño, 31-anyos kag ang nagtaliwan naman nga biktima amo si Wilgie Macero.
Samtang padayun naman nga ginabulong sa ospital ang tatlo ka mga nasamaran sa insidente nga sanday Shiela Brasileño Macero, asawa sang napatay kag utod sang suspek kag ang duwa pa sini ka mga utod nga sanday Ivy Brasileño Perez, 35 anyos kag Richard Brasileño, 39 anyos.
Sa interview sang Bombo Radyo kay Dr. Allen Camering, Law Enforcement Evaluation Officer II sang NAPOLCOM Region 6, iya ginpahayag nga posible nga pagapasakaan sang kaso ang suspek sang Arson with Homicide.
Suno kay Camering, madamo na ang nagareklamo sa suspek antes pa ang insidente bangud sa batasan sini nga kun makainom, indi na sini makontrol ang iya kaugalingon kag mahilig nga mangbisyo.
Ginpahayag man niya nga nagahinulsol gid ang suspek sa iya gin-ubra nga krimen kag handa na subong nga atubangon ang mga penalidad nga igahatag sa iya.
