Ginkondena ni Iloilo City Councilor Sheen Marie Mabilog ang natabo nga pagpanglampos ni Punong Barangay Gemma Calzado kay SK Kagawad Lorence Galvez sa Barangay Kasing-kasing, Molo, Iloilo City kagab-i, Abril 6.
Sa interview sang Bombo Radyo kay Mabilog, iya ginpahayag nga bisan may lamod sang pamulitika ukon wala ang rason sang paglainanay sang buot sang duwa, wala kuntani maglab-ot sa pisikal nga pagpanakit.
Suno pa sa iya, kun may ginabaton man nga benepisyo ang pamilya sang SK kagawad halin sa gobyerno, indi ini dapat pag-gamiton nga rason para sa pamulitika kag dapat ibutang ini sa insakto nga sitwasyon.
Dugang pa sang konsehal, indi ini ang una nga tion nga nadalahig sa kaangay nga insidente sang pagpanakit ang Punong barangay, bangud may nagliligad ini nga kaso kaangay man sini apang gin-areglo lamang sadto.
Suno pa kay Mabilog nga ginaplano nila nga istoryahan ini upod kay Iloilo City Vice Mayor Love-Love Baronda agud makafile sang resolusyon nga magakondena sa amo nga klase sang hitabo.
Nagapanawagan naman ini nga malikawan ang kaangay nga insidente kag mapabilin ang respeto sa tunga sang mga pumuluyo kag mga opisyal sang syudad.
