Naghatag na sang mando si Iloilo City Police Office Officer in Charge Police Colonel Wilbert Parilla sa station commander sang Iloilo City Police Station 4 nga imbestigaran sang maayo ang natabo sa tunga ni Barangay Kapitan Gemma Caldoza kag Sangguniang Kabataan (SK) Kagawad Lorence Galvez sang Kasing-kasing, Molo.
Ini kasunod sa panawagan ni Congresswoman Julienne “Jam-Jam” Baronda sa Philippine National Police (PNP) nga hatagan sang impartial and honest investigation ang nasambit nga insidente.
Sa interview sang Bombo Radyo kay PCol. Parilla, iya ginpahayag nga nagapadayon sa subong ang imbestigasyon sang natungdan nga police station kag ginahulat na lang sini nga ipasa sa ICPO ang report sang nasambit nga insidente.
Suno pa kay PCol. Parilla, nagapangayo man sang investigation report ang Police Regional Office (PRO) 6 agud nga mahatagan sang klaro kag intsakto nga imbestigasyon ang insidente nga natabo sa tunga sang duha ka barangay officials.
Dugang pa niya nga ginakabig nga isolated case ang natabo kag ginasiguro pa sa subong kun may kaangtanan sa pamulitika ang ginhalinan sang hiligut-anon sang duha.
Madumduman nga sa bahin ni SK Kagawad Galvez nga posible nag-umpisa ang kaakig ni kapitan sang iya sang nagsaylo ini sang partido nga ginsuportahan sang nagligad nga eleksyon kag nahibaluan man nga kabahin sang DOLE-Tupad programa ni Congresswoman Jam-Jam Baronda ang iloy sang SK Kagawad.
