Gin-athag sang Bureau of Jail Management and Penology (BJMP) Iloilo City District Jail Male Dormitory sa Ungka, Jaro nga indi konektado kag wala nagaubra sa ila opisina ang subject sa ginkasa nga buy-bust operation sang Iloilo City Police Station (ICPS) 4 sa San Juan, Molo, Iloilo City.
Ang subject amo si alyas Lepay, 34 anyos, dala man sa nadakpan ang tiyo sini nga nabaklan man sang ilegal nga droga.
Sa interview sang Bombo Radyo kay Jail Superintendent Denver Beltran, Jail Warden sang Iloilo City District Jail Male Dormitory, iya ginapahayag nga antes pa ini magpungko bilang bag-o nga Jail Warden sang Nobyembre 2025, may ara na nga daan sang Inmate Visitors Association (IVA), agud may mabilinan sang gamit sa gwa lang sang pasilidad bangud limitado lang ang madala nga gamit sang mga nagabisita sa mga Persons Deprived of Liberty (PDLs).
Samtang, isa ka bulan antes ang buy-bust operation sang ICPS 4, nagpakig-angut na ini sa ila rason nga gin-usisa ini sang ila talatapan apang nagpanginwala si alyas Lepay nga ini ang nagapalusot sang ilegal nga droga.
kahapon nga adlaw, nakig-istorya na si Beltran sa Inmate Visitors Association (IVA ) nga kakason na ang gintukod nila nga “baggage area” sa gwa sang pasilidad kag mangita na lang sang bag-o nga espasyo para sa seguridad sang District Jail Male Dormitory.
Ginpasiguro man sang natungdan nga hugot ang ila security measures kun sa diin, antes makasulod sa visiting area ang mga bisita sang mga PDLs, ginapangitaan ini nila sang valid nga identification card, ginapapirma, ginapaidalom sa body search kag, kun makaisa, sa strip search—isa ka maid-id nga pag-usisa sa mga bisita sang PDLs lakip na ang ila dala kag may naka-roving nga personnel kag mga security camera.
Magluwas sina, may ara man sang regular nga greyhound operation ang ila opisina sa bug-os nga pasilidad.
