Ginapangabay sang Iloilo Provincial Health Office (IPHO) sa publiko nga likawan anay temporaryo ang pagkonsumo kag pagkaon sang isda nga aloy.
Sa interview sang Bombo Radyo kay Dr. Rodney Labis, head sang Health Service Delivery Division, IPHO, iya ginpahayag nga ini agud malikawan ang posibilidad nga makabakal sa ka-batch sang aloy kun sa diin ang iban nga nakakaon naka-eksperyensya sang allergic reactions kag pagkalingin sang ulo.
Dugang pa ni Labis nga bangud wala ma-preserve sang maayo ang aloy kag kakulangan sang ice nga nabutang rason nga nagakaguba gilayon ang isda.
Ginpahayag man sini nga agud malikawan ang kaangay nga insidente dapat nga ibutang sa malamig nga temperature agud nga indi madali nga maglub-ok.
Nag-abiso man ini sa publiko nga kun magbakal sang isda siguraduhon lamang nga preska ini kag pillion ang indi pula ang mata kag daw kaangay nga nadunot na bangud sa kadugayon.
