Nagpanguna si Senador Ronald “Bato” dela Rosa sa may pinakamadamo nga absences sa Senado sa 20th Congress.
Base sa attendance sheet, naglab-ot sa 31 ka mga sessions nga wala nagtambong si Dela Rosa halin sang Hulyo 28, 2025 hasta Marso 18, 2026, kag 27 lamang sa 58 ka session ang natambungan sini.
Nahibaluan nga nagapangatubang sang ethics complaint si Dela Rosa bangud sa mga absences sini kag halos ginkakas ini sa tanan nga Senate committees.
Ulihi nga nakit-an sang publiko si Dela Rosa sang bulan sang Nobyembre 2025 matapos nga nagua ang mga huring-huring nga may warrant of arrest ini halin sa International Criminal Court (ICC).
Matandaan man nga sa ginpatigayun nga hearing sang ICC sa The Hague, Netherlands, isa si Dela Rosa sa ginhingadlan nga mga Co-perpetrators batok sa kaso nga crimes against humanity ni anay President Rodrigo Duterte kadungan sang madugo sini nga war on drugs.
Suno naman kay Senate President Tito Sotto, padayon gihapon nga naga-function ang opisina ni Dela Rosa apisar sang mga absences sini.
