Siyam ka indibidwal sa Passi City, Iloilo ang ginpangdala sa ospital matapos maka-eksperyensya sang paglingin sang ulo matapos magkaon sang ginbakal nga aloy halin sa nagalibot kag nagabaligya nga motorsiklo.
Sa interview sang Bombo Radyo kay Mayor Stephen Palmares, alkalde sang Passi City, iya ginpahayag nga ang kaso naghalin sa halos lima ka mga kabarangayan apang halos dululungan ang tiyempo sang pag-abot sang mga sintomas.
Suno kay Palmares, nagmando na ini sa pag-activate sang task force agud mabantayan ang mga naga-libot kag nagabaligya nga vendors nga wala sang nagaka-igo nga permit.
Ginalantaw man sang alcalde nga isa sa rason ang kapigaduhon sa karon nga panyempo kun ngaa ang iban nagapili na lamang nga magbakal sang mas barato nga pagkaon bisan wala sang kasiguruhan ang kalidad sini.
Sa subong naka-gwa naman ang mga ginpangdala sa ospital apang ginmandu-an na sang alcalde ang mga Punong barangay sa Passi City nga mag-aligmat kag siguraduhon nga mabantayan ang seguridad sang pumuluyo agud indi na maliwat ang kaangay nga insidente.
