Naga-okupa sang masobra 90% sang mga kaso sa Bureau of Jail Management and Penology (BJMP) Ungka sa Jaro, Iloilo City ang may kaangtanan sa illegal nga droga.
Sa interview sang Bombo Radyo kay Jail Superintendent Denver Beltran, Jail Warden sang Iloilo City District Jail Male Dormitory, iya ginpahayag nga kadam-an sang Persons Deprived of Liberty (PDL) sa amo nga pasilidad ang ginakabig nga may drug-related offenses, kag kalabanan sa ila halin man sa syudad sang Iloilo.
Suno pa kay Beltran nga ang nasambit nga pasilidad may “ideal capacity” lamang nga 148 ka PDL, apang sa karon may ara na ini sang 1,334 ka mga inmates.
Bangod sini, naglab-ot sa 798% ang congestion rate sang prisohan, nga nagapakita sang kakulangan sa espasyo kag pasilidad para sa mga PDLs.
Samtang, ginpahayag man sang Jail Warden nga may yara na sang pending nga construction site kun sa diin naghatag sang lote ang Iloilo City Government agud makapatukod sang dugang nga pasilidad para sa mga Persons Deprived of Liberty (PDL).
