Nagapati ang Local Economic Enterprise Office (LEEO) nga may mga tawo nga nagapakuno-kuno nga bolantero kag amo ang nagatuga sang gamo sa syudad.
Ini may kaangtanan sa natabo nga komosyon sa syudad kun sa diin involved man ang mga nagabolante kag ang composite team sang syudad nga nagapatigayon sang clearing operation.
Sa interview sang Bombo Radyo kay Maricel Mabaquiao, head sang Local Economic Enterprise Office, iya ginpahayag nga kaangay nga may yara sang tawo nga nagasulsol sa mga bolantero agud magpagamo.
Suno sa iya, sang natabo ang komosyon, may nga indibidwal nga indi man gani niya kilala kag indi man pamilyar sa iya kag amo ini ang iya ginakatingalahan.
Pahayag ni Mabaquiao, antes pa ginhimo ang clearing operation, ginpatawag na nga daan ang mga bolantero kag gin-eksplikaran lakip na ang schedules kag mga pagsulundan nga ginapatuman sang Iloilo City Government sa nagkalain-lain nga merkado.
Dugang pa ni Mabaquiao, padayunon sa gihapon sang LEEO ang operation batok sa mga naga-olante nga nagabaligya sa dalan sa indi gintalana nga market day kag wala nakarehistro sa ila opisina.
Paathag pa niya, ila ginabuhat ang nasambit nga operation agud masiguro nga patas sila sa pagpatuman sang mga layi ilabi na nga nagareklamo ang mga regular nga market vendors nga ara sa sulod sang Iloilo Terminal Public Market.
Samtang, sa bahin naman sang graduating student nga isa man sang nag-agaw sang atensyon sa kinagamo nga natabo, ginpahayag ni Mabaquiao nga naga-pakig-istorya sila sa mga nagabaligya sang gulpi lang naglusot kag nagpanipa sang kamatis ang nasambit nga estudyante.
Dugang pa sini nga ang upod man sini nga bolantero ang nagpanghaboy man sang rabanos sang natabo ang komosyon.
Gin-athag ni Mabaquiao nga maayo ang ila pagpakig-istorya sa mga naga-bolante, apang may iban nga wala lang nagasunod sa ginpatuman nga patakaran sa syudad.
