Nakapalagyo sa iya previous nga kaangay nga kaso nga shooting incident si Lloyd Katipunan sa distrito sang Mandurriao rason nga wala ini napreso sang tuig 2023.
Madumduman nga suspek man sa pagpangluthang si Lloyd Katipunan sang Marso 9, 2023 matapos nga gintiro sini gamit ang isa ka shotgun ang iya nga lead security officer sa isa ka call center Tower sa Barangay Bolilao, Mandurriao, Iloilo City.
Sa interview sang Bombo Radyo kay PCapt. Jobert Amado, officer in charge sang Iloilo City Police Station 5, iya ginpahayag nga bangud man sa trabaho ang nangin motibo sa krimen ni Katipunan matapos nga gin-suspend ini siya.
Suno kay PCapt. Amado, on-going sa gihapon ang kaso ni Katipunan sa ila police station kun sa diin ginpasakaan siya sang kaso nga Frustrated Murder paagi sa regular filing.
Pahayag ni PCapt. Amado, nagpatigayon man sang hot pursuit ang mga kapulisan matapos sang krimen nga ginbuhat ni Katipunan apang nakapalagyo ini kag wala na nadakpan.
Dugang pa niya, ila liwat pagasekyaron ang status ni Katipunan sa Hall of Justice angut sa krimen nga iya ginhimu sa distrito sang Mandurriao bangud nga posible nga magdugang ini sa mga kaso nga iya sa subong ginaatubang.
