Ginapabaskog sang Bureau of Jail Management and Penology (BJMP) Ungka ang ila mga tikang agud masiguro ang ikaayong lawas sang Persons Deprived of Liberty (PDLs) sini nga mainit sang tiyempo.
Sa interview sang Bombo Radyo kay Jail Superintendent Denver Beltran, Jail Warden sang Iloilo City District Jail Male Dormitory, iya ginpahayag nga apisar nga nag-lab-ot sa 798% ang congestion rate sang prisohan, wala sila nagapabaya sa paghimo sang mga tikang agud makapahagan-hagan ang epekto sang mainit nga panahon.
Suno pa sa iya, ila ginasunod ang memorandum nga ginpagwa sang BJMP Region 6 kun sa diin may ara sila sang apat ka mga aspeto nga ginasundan.
Una, ang hydration ukon pag-inom sang nagakaigo nga tubig sang mga PDLs agud malikawan ang dehydration.
Ikaduha, ang ventilation sang mga selda paagi sa pagpasiguro nga wala sang nagapugong sa mga bintana agud makasulod sang maayo ang hangin.
Ikatlo,padayon ang pagtudlo sa mga PDLs nahanungod sa husto nga hygiene kag sanitation, pareho sang regular nga pagpaligo.
Ika-apat, ginapasiguro man sang BJMP nga padayon ang suplay sang tubig sa sulod sang pasilidad.
Dugang pa diri, ginapreparar man sang jail unit ang mga kinahanglanon batok sa mga summer diseases kag ginasiguro nga may yara sang nagakaigo nga bulong para sa mga may mga balatian.
Nagpasalamat man si Beltran sa local government unit kag sa mga barangay nga padayon nga naga hatag sang suporta sa pasilidad.
