Patay ang walo ka mga kabataan matapos ginluthang sang suspek sa Shreveport, Louisiana, Estados Unidos sang Amerika.
Sa inisyal nga impormasyon, naga-edad ang mga biktima sang 1-14 anyos. Wala pa gin-release ang ila nga mga pangalan.
Natabo ang insidente pasado alas sais sa Domingo sang aga oras sa amo nga state.
Gintawag sang pulis nga “extensive” ang crime scene bangud natabo ini sa tatlo ka balay sa lapta-lapta nga mga area.
Suno sa inisyal nga report halin sa Shreveport Police Department, 10 tanan ang gintiro sang suspek apang may duha nga nakaluwas.
Matapos ang pagpangluthang, nagpalagyo ang suspek, apang ginlagas ini sang awtoridad, kag ginluthang-patay pag-abot sa Bossier Parish.
Wala pa ginpatpat ang identity sang suspek, apang suno sa pulis, ang pila sa kabataan ang himata man mismo sang gunman.
Wala man ginplastar kun ano ang posible motibo sa likod sang krimen. Nagapadayon pa subong ang imbestigasyon sa insidente.
Suno sa Gun Violence Archive (GVA), ini nga insidente amo ang pinakamakamamatay nga mass shooting sa US halin sa January 2024 sang may walo man nga ginpangtiro-patay sa Joliet, Illinois.
Ang GVA isa ka nonprofit nga naga-track sang US gun violence. Ginakabig sini nga mass shooting ang insidente kun apat ukon mas madamo pa ang napatay magluwas pa sa suspek.#
