Ginapalapta ni former presidential spokesperson Harry Roque nga ”fake news” ang report nga nadakpan sa Prague, Czech Republic ang kontrobersyal kag pugante nga anay kongresista nga si Elizaldy “Zaldy” Co.
Suno kay Roque, personal sini nga ginpakig-angutan ang immigration authorities sa Prague kag ginsiling nga wala sa rekord nga yara sa ila kustodiya si Co.
“Tinawagan ko yung immigration police sa Prague… wala,” suno kay Roque.
“For the record, ang ating presidente ang nagkalat ng fake news. Confirmed, confirmed, confirmed,” suno sa former presidential spokesperson nga isa man sa gina-ayam sang gobyerno subong.
Matandaan nga ginkumpirma ni President Ferdinand “Bongbong” Marcos Jr. nga gin-aresto si Co bangud sa pagsulod sa border nga wala sang proper documentation. Nag-update ini nga yara ang anay kongresista sa kustodiya sang Prague authorities.
Una naman nga ginpahayag sang DILG nga posible tatlo ka semana pa ang ilawig antes mapabalik sa Pilipinas si Co nga amo ang isa sa pinakadaku nga personalidad sa flood control scandal.
Nahibaluan nga wanted si Co halin sang Nobyembre 2025 bangud sang kaso nga graft kag malversation nga naangot sa mga anomaliya sa P289.5-million flood control project sa Oriental Mindoro.
Nag-resign siya bilang congressman sang Septyembre 2025 matapos gin-akusaran nga mastermind sang binilyon ka pesos nga flood control kag iban pa nga infra budget insertions sa 2025 budget.
Sa sunod-sunod nga mga expose sini sang 2025, gin-implicate sini si Marcos kag former House Speaker Martin Romualdez sa binilyon ka pesos nga insertions sa 2025 national budget.
Nagpanindugan ini nga nagsunod lamang siya sa mga mandu kaangot sa ginaalegar nga budget insertions.#
