Naghatag sang bulig ang Department of Social Welfare and Development (DSWD) sa pamilya sang motorcycle taxi driver nga nag-collapse kag napatay samtang nagalinya para sa ayuda sa Quezon City.
Natabo ang insidente sang Sabado, Abril 18, sa Quezon Memorial Circle.
Ini nga payout ang kabahin sang DSWD cash relief assistance program para sa public utility vehicle drivers. Ginhatag ang tag-P5,000 sa ila agud mapahagan-hagan ang epekto sang mataas nga presyo sang gatong.
Suno kay DSWD Assistant Secretary and spokesperson Irene Dumlao, gilayon nga nagmandu ang ahensya sa DSWD-National Capital Region nga magpakig-angot sa ospital, sa pamilya, kag sa employer sang driver agud masiguro ang madasig nga paghatag sang bulig.
Nagpakigkita man mismo si Sec. Rex Gatchalian sa pamilya agud nga ipalab-ot ang iya pagpakig-unong kag agud makit-an ang iban pa nila nga kinahanglanon.
Magahatag ang DSWD sang bulig para sa galastuhon sa ospital, pagpalubong, kag pamilete sang mga himata.
Hatagan man sang educational assistance ang pamilya para nga mapadayon ang pag-eskwela sang bata sang driver.#
