Dako gid ang posibilidad nga ma-convict si anay President Rodrigo Duterte matapos nga ginbasura sang Appeals Chamber ang apat tanan ka mga grounds sa apelar ni Duterte.
Sa interview sang Bombo Radyo kay Former Rep. Neri Colmenares, isa ka Human Rights Lawyer, iya ginpahayag nga naghinugyaw gid ang pamilya sang mga biktima sang war or drugs samtang nagalantaw sang nangin deklarasyon sang ICC nga magapadayon ang proceedings sa kaso ni Duterte kag ginabantayan na lang ang resulta sang Pre-Trial Chamber I.
Suno sa iya, maluya kag indi mapatihan ang nangin depensa sang kampo ni Duterte sa Pre-Trial nga wala ini sang mando sa mga kapulisan nga magpatay sang mga gina-alegar nga drug addict, bangud nga madamo sang mga ebidensya nga siya gid ang nagamando nga pamatyon ang mga adik.
Nagapati man si Colmenares nga sala ang nangin stratehiya ni Duterte nga maglikaw nga mag-atubang sa trial bangud nga mas ginapalawig sini ang proseso kag nagapakita nga guilty ini sa crimes against humanity nga iya gina-atubang.
Dugang pa sang anay kongresista nga sa tion nga madeklarar nga guilty si Duterte, ini amo ang labing una nga inidbidwal sa Asya nga maconvict sa ICC.
