Naglab-ot sa 23 tanan ka mga pamilya ang apektado sa sunog nga nagluntad kaina sang aga sa Barangay Kasin-kasing, Molo Iloilo City.
Ini ginalakipan sang 93 tanan ka mga indibidwal kun sa diin 17 tanan ka mga balay ang totally damaged kag anom naman ang partially damaged.
Sa interview sang Bombo Radyo kay Punong Barangay Gemma Calzado sang Kasing-Kasing, Molo Iloilo City, iya ginpahayag nga gilayon man nga nagresponde ang Bureau of Fire Protection agud matapna ang kalayo.
Apang bangod tuman kadako ang kalayo wala ini gilayon nga mapunggan kag naglapta sa mga tupad nga mga kabalayan ang sunog.
Suno kay Punong barangay Calzado, may pila naman ka mga residente ang wala gid nakasalbar sang ila mga kagamitan.
Sa karon, nag-evacuate ang mga apektado nga pamilya sa Baluarte Elementary School nga gin-designar bilang evacuation center.
Ginpahayag man ni Calzado nga suportado sila ni Mayor Raisa Treñas kag gilayon ini nga nagahatag sang bulig sa mga apektado.
Padayon naman ang imbestigasyon sang mga otoridad sa gintuan sang sunog.
