Igapatuman sang Department of the Interior and Local Government Region 6 ang mandatory kag surprise drug testing para sa mga barangay kag Sangguniang Kabataan (SK) officials sa Western Visayas.
Suno kay Juan Jovian Ingeniero, Regional Director sa DILG 6, iya ginpahayag nga ini nga tikang ginpatigayon kasunod sang nagaguwa nga report nga may pila ka barangay kag SK officials ang nadakpan sa nagkalain-lain nga drug buy-bust operations sa sa Iloilo.
Sa madumduman, sang Pebrero 15, isa ka incumbent punong barangay sa Dionisio, Iloilo ang nakuhaan sang ginabulubanta ₱1.5 milyon nga balor sang ilegal nga droga.
Samtang sa Dingle, Iloilo, isa man ka barangay kagawad ang nadakpan nga may yara sang ₱2.1 milyon nga balor sang ilegal nga droga.
Ginaduso sang ila opisina ang kampanya nga “drug-free workplace” ilabi na sa lebel sang barangay agud masiguro ang integridad sang mga local officials.
Ini nga programa ginpatuman na sa Balasan, Iloilo bilang pilot area, kag ginapaabot nga palaparon pa ini sa iban nga mga lugar sa rehiyon.
Padayon naman ang kampanya sang gobyerno batok sa ilegal nga droga, nga nagalakip sang mas istrikto nga monitoring kag implementasyon sang mga polisa sa lokal nga panguluhan.
Gindugang pa ni Ingeniero, sa pagkoordinar man sang DILG sa Philippine National Police, na-file na ang nagakaigo nga mga kaso batok sa mga nadakpan nga opisyal.
