Nagapabilin nga problema ang wala pa matapos nga mga proyekto sa Barangay Dacutan, Dumangas, Iloilo nga dapat kuntani makabulig sa paglikaw sang pagbaha kun magluntad ang mamunog nga pag-ulan sa lugar.
Sa interview sang Bombo Radyo kay Punong Barangay Stephen James Foerster sang Brgy. Dacutan, ginpahayag sini nga mabudlay ang ila sitwason kun magtag-ululan na bangud ginabaha ini kun sa diin nagakaapektuhan ang masobra 50 ka mga kabalayan.
Suno sa iya, dako ang mabulig sang proyekto nga drainage system kun mtapos na ini gilayon agud mangin madali ang pag-subside sang tubig sa lugar kag agud indi na mabudlayan ang mga residente sa lugar.
Dugang pa sang Punong Barangay maprotektahan man ang mga humayan sa lugar kun makaayo na ang nasambit nga proyekto.
Nahibaluan nga nagpahayag ang engineer sang Department of Public Works and Highways Second District nga may mga rason kun ngaa wala pa matapos ang nasambit nga mga proyekto, lakip na ang problema sa right of way nga nagaka-delay sa implementasyon sini.
Sa pihak sini, nagalaom naman ang mga residente nga matapos na gilayon ang mga proyekto agud masolbar ang problema sa ila barangay.
