Nasalabat ang isa ka second year criminology student matapos ginsulong sang lima ka mga lalaki ang balay sang isa ka tanod sa Zone 1, Bangga Luding, Compania Central, Molo, Iloilo City pasado ‘las 10 kagab-i.
Ang nabiktima amo si Alyas Faith, 20-anyos, residente sang amo man nga lugar, nga may pilas sa kilid sang tiyan bangud sa pagpaniro sang suspek.
Na-identify naman ang mga suspek nga nagsulong nga amo sanday alias Joshua nga may igu man sang bala sa tiil matapos ang pag-agaway sang armas kag Alyas Boknoy, lunsay 18-anyos, kag yara na sa kustodiya sang Iloilo City Police Station (ICPS) 4.
At-large naman ang tatlo pa nga amo sanday Alyas Kring-kring, 25-anyos; alyas Sipil, 30-anyos; kag alyas Inday, 30-anyos man ang edad.
Sa interview sang Bombo Radyo kay Edward, amay sang naulamid nga estudyante kag tanod man sang barangay, iya ginpahayag nga minutos antes magsulong ang mga suspek, may nagtawag sa iya agud magpahibalo nga may masulod sa ila lugar.
Sunod nga nabatian nila nga may nagasinggitan kag ginasipa ang kudal sang balay sang ila kasilingan nga isa man ka tanod bangud ginpatihan sang mga suspek nga asset ini sang kapulisan.
Ginpahayag nga gintayaan man sang suspek ang pila nga mga indibidwal nga yara sa gwa sang ila balay.
Nagdali-dali man gwa si Edward agud mag-responde apang wala ini makahibalo nga nagasunod ang iya bata kag ulihi na natalupangdan nga may igo ini sa kilid sang tyan.
Padayon ini subong nga ginabulong sa ospital.
SAMPAW-SAMPAW NGA REKORD
Sa interview sang Bombo Radyo kay Police Captain Ryan Christ Inot, hepe sang Iloilo City Police Station 4, iya ginpahayag nga buta ang blotter book sang barangay sa pangalan sang lima ka suspek bangud sang lain-lain nga iligal nga aktibidad.
Nahinambit sini ang ginaalegar nga involvement sa iligal nga droga kag pagpangawat.
Suno pa kay Inot, may amo na sini nga daan nga record ang lima halin sang sila ang menor de edad pa lamang, kag nadala pa tubtub nga yara na sila sa legal nga pang-edaron.
Ginpahayag sini nga ginpinsar sang mga suspek nga ang tanod amo ang nagapanugid-sugid sang ila nga iligal nga buluhaton gani nga nagsulong sila kagab-i samtang hubog.
Ginkumpirma sang pulis nga indi nila asset ang tanod.
Kagab-i, yara man ini sa sulod sang ila balay, apang ginpakamaayo sini nga indi anay magguwa agud nga indi na magdaku pa ang gamo.
Wala pa na-recover ang armas nga gin-gamit sang mga suspek sa krimen.#
