Indi pa maangot sa El Niño phenomenon ang tuman nga kainit nga mabatyagan subong sa pila ka areas sa Western Visayas lakip na sa syudad sang Iloilo.
Sa interview sang Bombo Radyo kay Dr. Nathaniel Servando, administrator sang Philippine Atmospheric, Geophysical and Astronomical Services Administration (PAGASA), iya ginpahayag nga yara pa gihapon ang El Niño Southern Oscillation ukon ENSO Neutral condition.
Dugang sini, may mga lugar lang nga naga-eksperyensya sang dry spell kag dry condition bagud nga wala nagtupa ang mabaskog nga ulan halin sang Enero.
Ginklaro sini nga ang init nga ginabatyag subong ang indi pa kabahin sang El Niño phenomenon kag may ginalauman pa gani nga pag-ulan-ulan sa Mayo.
Nauna na nga ginsiling sang ahensya nga 79% na ang tyansa nga ma-eksperyensyahan ang El Niño sa June-July-August season kag mabatyagan ang epekto sini sa ulihi nga bahin sang tuig tubtub sa temprano nga bahin sang 2027.
Nahibaluan nga subong nga weekend, nagadangat sa danger level ang heat index sa Roxas City kag Mambusao sa Capiz, kag sa Iloilo City kag sa Dumangas sa Iloilo Province.
Sa forecast sang state weather bureau, halin sa 42 degrees Celsius tubtub sa 47°C ang heat index sa pila ka lugar subong nga Sabado kag bwas, adlaw sang Domingo.
Ang heat index nga yara sa range sang 42°C kag 51°C ang makabig na nga yara sa “danger” category kun sa diin posible mabatyagan ang heat cramps kag heat exhaustion kag posible man ang heat stroke kun magpadayon sa pagbulad sa init.
