Naka-abot na sa siudad sang Iloilo sang labing una sini nga electric powered garbage truck bilang kabahin sang pagpaayo sang sistema sang pag-manage sang basura ilabi na ang food waste ukon damog.
Ang amo nga proyekto ginpatuman paagi sa partnership sang European Union kag United Nations Development Programme (UNDP).
Ginpahayag nga wala sang ginbayran ang syudad para sa amo nga truck bisan pa ini nagabalor sang P6.6 million.
Sa interview sang Bombo Radyo kay Engr. Neil Ravena, head sang Iloilo City General Services Office, iya ginpahayag nga ang truck may yara sang maximum capacity nga duha ka tonelada sang food waste.
Pagagamiton ini sa pagkolekta sang mga food waste ukon damog halin sa mga hotel kag restaurant sa syudad.
Ginpahayag man ni Ravena nga bangod ginhingadlan ang Iloilo City bilang UNESCO Creative City of Gastronomy, importante nga may yara sang epektibo nga sistema sa pagdumala sang food waste.
Sa sini nga tikang, malikawan ang pagkontaminar sang iban nga basura kag mas mapahapos ang pag-segregate sang solid waste.
Sa karon, naga-pakig-angot na ang siudad sa nagkalain-lain nga hotel kag restaurant para magbulig sa implementasyon sang proyekto.
Ang electric garbage truck maga-operate nga may driver kag technician agud masiguro ang husto nga pagpadalagan sang sistema.
