Nag-abiso ang Office of Civil Defense Region VI sa publiko nga maghalong subong nga tyempo bangud sang padayon nga pagtaas sang temperatura sa rehiyon.
Sa interview sang Bombo Radyo kay Raul Fernandez, Regional Director sang OCD VI, iya ginpahayag nga importante nga mahibaluan sang publiko ang dapat nga himuon agud malikawan ang malain nga epekto nga dala sang mainit nga tyempo.
Suno kay Fernandez, samtang padayon ang mainit nga panahon, iga-activate man sang OCD VI ang task force para sa El Niño agud masiguro ang paghatag sang nagakaigo nga serbisyo kag bulig sa publiko.
Pahayag ni Fernandez, may igapahamtang mn nga mga cooling station sa pila ka lugar agud mabuligan ang mga residente nga mapahagan-hagan ang epekto sang init.
Nahibaluan nga may ara sang posibilidad nga magpadayon ini tubtob sa first quarter sang masunod nga tuig.
Ginpasiguro sang OCD VI nga padayon ang ila pagmonitor sang sitwasyon kag paghatag sang impormasyon kag abiso sa publiko agud malikawan ang peligro nga dala sang tuman ka init nga tyempo.
