Nagpanugyan ang isa ka legal expert nga mas maayo gid nga indi na lang pag-ipaagi sa social media post agud pakahuy-an ang mga indibidwal nga wala nagabayad sang utang.
Sa interview sang Bombo Radyo kay Atty. Jonald Dorado, Professor sang Social Science Department sa West Visayas State University, iya ginpahayag nga may ara gid sang tion nga indi mapunggan nga magpautwas sa social media, apang mas maayo gid nga likawan ini bangud sa posible gid nga konsekwensya sang amo nga akto kaangay sang pagpasaka sang reklamo sa idalom sang Cybercrime Prevention Act.
Suno kay Dorado, dapat may ara gid sang kasugtanan ukon pamatuod nga nagpangutang ang isa ka indibidwal agud nga indi ini makapalagyo sa iya responsibilidad, bisan pa nga himata ukon malapit ini sa nagpautang.
Nagapati man ini nga agud nga malikawan ang gamo, mas maayo nga sturyahan gid sang maayo agud nga indi maglab-ot pa sa barangay kag sa korte ang nasambit nga problema.
