Ginklaro ni Punong Barangay Pancho Vijuan sang Barangay Loboc, Lapuz, Iloilo City, nga wala sang nagtaya sa iya sang armas kag wala man sang nagluntad nga komosyon sa ulihi nila nga gab-i sa ginhiwat nga City Disaster Risk Reduction and Management Council seminar-workshop sa isa ka hotel sa Talisay City, Negros Occidental sang nagligad nga Abril 21.
Ini matapos nga daw kaangay nga ginsiko siya sang ginapahayag nga gwardya ni Ong.
Ang guwardiya amo ang ginkilala kay Bertchon Gulmatico, 63-anyos, kag residente sang MV Hechanova, Leganes, Iloilo.
Sa interview sang Bombo Radyo kay Punong Barangay Vijuan, iya ginpahayag nga natabo ang insidente matapos ang ila panyapon sa nasambit nga aktibidad kun sa diin gulpi lang nga nagsal-ot si Gulmatico sa tunga sang ila istoryahanay ni Ong.
Didto na kag ginsita ni Vijuan ang body guard.
Apang pagtalikod sang guwardya, daw kaangay nga hungod nga ginsiko sini ang Punong Barangay kag gin-alsa pa ang iya nga panapton agud ipakita ang sukbit sini nga .45 pistol.
Gilayon man nga nagtawag si Vijuan sa kapulisan sang Talisay City Police Station agud nga malikawan ang posible nga magluntad nga gamo.
Nahibaluan nga ginpasakaan naman ni Vijuan sang kaso nga Maltreatment si Gulmatico.
Dugang man ni Punong Barangay Vijuan, wala pa sila makaisturyahanay liwat ni Councilor Ong matapos ang ila nangin aktibidad sa Negros.
