Naga-preparar na ang Sangguniang Kabataan (SK) Federation of Iloilo City sa pagpatukod sang transition team agud mag-inventory sang mga kagamitan nga i-turn over sa masunod nga magapungko nga mga opisyales.
Ini ang sunod sa direktiba ni Department of Interior and Local Government 6 (DILG 6) Regional Director Juan Jovian Infenier nga dapat bago matapos ang tuig 2026 dapat na-turn over na sa mga bago nga opisyales ang mga properties kag kagamitan sang barangay kag SK.
Suno kay Sk Federation President sang Iloilo City, Jelma Implica, bilang pagsunod sa direktiba sang DILG 6, ila na sa subong ginahimu ang mga tikang agud ma-umpisahan na sang mga SK officials sa syudad ang pag-iventory sa gamit nga iya sang SK.
Pahayag pa ni SK Federation President Implica, nakahanda man sila sa kun ano man ang mangin mandu sang National Government kasunod sa plano nga temporaryo nga i-postpone ang Barangay kag Sangguniang Kabataan Elections (BSKE) sa November 2, 2026.
Ginpahayag man niya nga wala sila nagapabor ukon nagakontra sa posibilidad sang pag-postpone sang eleksyon kag magahulat lamang sila sa pinal nga desisyon.
Dugang pa ni SK Federation President Implica, nakahanda naman ang mga SK officials sang syudad sa pagbuya sa ila pwesto apang ginasigurado nga maubra sang mga ini sang maayo kag matapos ang ila mga responsibilidad sa nabilin nga mga bulan antes nga eleksyon.
