Naglab-utanay kag nagbaisay ang masobra tatlo ka bolantero sa Iloilo Central Market kahapon sang hapon, Abril 27, 2026, bangud sa ginpahayag nga agaway sang pwesto samtang nagapatigayon ang mga ini sang “market day”.
Sa interview sang Bombo Radyo kay alyas “Gwapa,” isa ka bolantera, iya ginpahayag nga ginhatagan na sila nga daan sang numero kun diin sila magapwesto apang may naglapas sang sini nga pagsulundan kun sa diin nag-unahay sa pagkuha sang pwesto ang iban nga bolantero, gani nga natabo ang komosyon.
Suno pa sa iya, nag-intra man ang upod sang isa ka bolantera nga dala sa amo nga pagbaisay gani nga nadugangan nga naglala ang komosyon sa tunga sang mga ini.
Samtang sa pihak nga bahin, suno kay Maricel Mabaquiao, head sang Local Economic Enterprise Office (LEEO), iya ginpayag nga may isa sa mga bolantero nga wala nakapangayo sang numero para sa gintalana nga pwesto rason nga may nagluntad nga komosyon.
Suno kay Mabaquiao ang ini nga numbering system amo ang dapat gamiton agud mangin organize ang pagbaligya sang mga bolantero.
Dugang pa sini nga may yara man sang ginpangbutang nga marka agud malikawan ang pag-ilinaway sa tunga sang mga bolantero.
Gilayon naman nga nagresponde ang mga enforcer kag kapulisan sa lugar agud husayon ang komosyon sa tunga sang mga bolantero sa Iloilo Central Market.
