Balantayan subong nga adlaw, Abril 29, ang katapusan nga hearing sang House Committee on Justice nga nagatuyo nga ma-establisar kun may probable cause sa impeachment complaints batok kay Vice President Sara Duterte.
Maga-sentro ang hearing sang panel sa kontrobersyal nga pahayag ni Duterte sadtong 2024 sang ginsapubliko sini nga kun may matabo sa iya, may na-istorya naman siya agud patyon man si President Ferdinand “Bongbong” Marcos Jr., First Lady Liza Araneta-Marcos kag anay House speaker Martin Romualdez.
Tungang gab-i ang online press conference ni Duterte sang amo nga tion sang nag-ibwal ang iya kaakig matapos nga gin-detain ang iya chief of staff nga si Zuleika Lopez.
Gin-imbitar ang National Bureau of Investigation (NBI) sa pagpanguna ni Director Melvin Matibag agud nga i-presentar sa House committee ang ila nga findings kasunod sang imbestigasyon sa amo nga alleged assassination threat.
Nahibaluan nga gin-gamit sang endorsers sa ikaapat nga impeachment complaint ang amo nga statement ni Duterte.
Ang testimoniya sang NBI amo ang ginalauman nga makabulig nga matumod kun ang pahayag ni Duterte ang naga-constitute sang “credible and actionable threat” sa idalom sang layi sang Pilipinas.
Magluwas diri, desisyunan man sang justice panel subong nga adlaw kun buksan bala ang selyado nga kahon halin sa Bureau of Internal Revenue (BIR) nga naga-unod sang income tax returns (ITRs) ni Duterte kag sang iya bana nga si Manases Carpio.
Subong man nga adlaw, ginalauman nga magadesisyon naman ang panel sa pagpanguna ni Batangas 2nd district Rep. Gerville Luistro kun may probable cause bala agud ipasaka sa trial ang ang third and fourth impeachment complaints nga una na nga nakit-an nga sufficient in form, substance, kag grounds.
Kun madayon ini, maga-set ang committee sang hearing sa Lunes, Mayo 4, para sa pag-apruba sang committee report antes ini ipasa sa plenaryo sa amo man nga adlaw.
Nahibaluan nga naghulag naman ang Office of the Solicitor General kag naghingyo sa Korte Suprema nga ibasura ang duha ka petisyon nga amo ang nagakwestyon sang constitutionality sang impeachment case batok sa Vice President.
Ang isa ka petisyon ang gin-file mismo ni Duterte.
Ang Office of the Solicitor General amo ang nag-representar sang House justice panel.#
