Gin-surrender sang tagsa ka ginikanan ang duha ka menor de edad nga lunsay suspek sa pagpangbuno sa pareho man nila nga menor de edad sa Fort San Pedro, Iloilo City.
Ang nasamaran sa insidente amo si ”alyas Ian”, 17 anyos, residente sang Veterans Village, City Proper; samtang ang mga suspek naman amo ang duha ka 16-anyos.
Sa interview sang Bombo Radyo kay PCapt. Melchor Tolentino, hepe sang Iloilo City Police Station 1, iya ginpahayag nga pagkatapos sang insidente, gilayon sila nag-conduct sang hot pursuit operation apang wala na ang duha sa ila nga address sa syudad kag nakalab-ot sa ila balay sa probinsya sang Iloilo kun sa diin, gilayon man nga nagkoordinar ang ila ginikanan.
Nagagwa sa imbestigasyon nga nagapungko ang biktima upod ang iya duha ka abyan kag nagahampang sang mobile game sang naglabay ang duha ka suspek kag palahog nga naghambal nga “nagbinugoy naman kamo da!” bangud kilala sang mga ini ang isa ka abyan sang biktima.
Na-misinterpret sang biktima ang ini nga mga tinaga rason nga nagpanglampos sang dos por dos apang nakalikaw ang mga suspek kag nagbalos ang mga ini buno bangud may dala nga kutsilyo.
Napilasan sa nawala nga butkon kag gilayon nga gindapatan sang first-aid kag gindala sa ospital ang biktima kag subong nakaguwa naman.
Wala naman ma-recover sang kapulisan ang gingamit nga kutsilyo.
I-refer naman sang kapulisan ang mga suspek sa talatapan sang City Social Welfare and Development Office (CSWDO) bangud mga menor de edad ang mga ini.#
(via Bombo Phauline Pillora)
