Nagpahanumdom ang isa ka climbing enthusiast nga kinahanglan ang insakto nga preparasyon antes magsaka sa bukid, ilabi na subong nga summer season kun sa diin madamo ang nagahagaday sa pag-hiking.
Sa interview sang Bombo Radyo kay Nesgen Caburlan Zerrudo, iya ginpahayag nga importante ang pagplano antes magkadto sa mga matag-as nga kabukiran.
Naghatag man ini sang mapinuslanon nga mga tips para sa mga bag-uhan sa mountaineering.
Una dapat mentally kag physically fit ang isa ka tawo.
Ikaduwa, importante nga antes magplano sa pagsaka sa bukid dapat nakondisyon ang lawas paagi sa pag-ehersisyo antes mag-hike.
Ikatatlo, suno pa kay Zerrudo nga dapat mamag-an lamang ang mga dalal-on kag importante nga indi magkaon sang mga mabug-at nga pagkaon kaangay sang baboy kag dapat nga madamo ang prutas kag utan.
Sa bahin naman sang kagamitan, nagpahanumdom ini nga magsuksok sang presko kag komportable nga panapton, kag dapat indi mabug-at ang bag kag limitado lamang sa importante nga dal-on pareho sang first aid kit kag mga kinahanglanon.
Nagbilin man ini sa mga hikers nga dapat sa kada lugar nga ila pagakadtuan dapat ipabilin ang katinlo sang lugar kag respetuhon ang dunang manggad sang palibot.
Dugang pa sini nga importante ang disiplina sa kaugalingon kag dapat wala sang ibilin nga basura sa mga lugar nga ginakadtuan bangud bilang isa ka responsable nga hiker wala mo ginaguba ang lugar nga ginahalungan sang mga tawo nga naga-estar malapit dira.
