Nagpahanumdom ang isa ka veterinarian kun paano ang insakto nga pag-atipan sang mga kasapatan sini nga tuman ka mainit ang tyempo.
Sa interview sang Bombo Radyo kay Dr. Jonic Natividad, Chief sang Regulatory Division sang Department of Agriculture Western Visayas, iya ginpahayag nga subong nga mainit ang panahon nabudlayan ang mga kasapatan sa pag-cool down sang ila lawas bangod sa mataas nga temperatura.
Suno sa iya, mahimo ini magdala sang heat stress sa ila nga pwede magresulta sa organ failure sang mga kasapatan kun mapabayaan.
Ginpahayag sini nga dapat mangin sensitibo ang mga tag-iya kag mga mangunguma sa ginabatyag sang ila mga kasapatan subong nga tag-iliinit.
Nagbilin man ini sang pila ka mga praktikal nga mga tips agud malikawan ang peligro sang mainit nga tyempo sa mga kasapatan.
Una, nagpahayag ini nga dapat ibutang sa mga lugar nga indi mainit ang mga kasapatan kaangay sang mga shaded area nga ila masilungan.
Butangan man sang bastante nga tubig ang mga kasapatan bangud importante man nga mapainom sila sang nagakaigo nga tubig.
Sa bahin naman sa pagpakaon, nagrekomendar si dr. Natividad nga dapat ang high-fiber nga pagkaon ang ihatag sa mga kasapatan kag mas maayo nga paka-unon sila sang maaga kag sa hapon, indi lang sa tungang adlaw bangud sa grabe nga kainit.
Nagpahanumdom man ini sa publiko nga mangin alerto sa mga senyales sang heat stress sa ila mga kasapatan agud malikawan ang malala nga epekto sang mainit nga tyempo.
