Dako ang pagpasalamat sang Punong Barangay sang Hinactacan, La Paz, Iloilo City sa nagkalain-lain nga sektor nga nagbulig agud mapabilin ang kalimpyo sang mga mangroves sa ila lugar.
Sa interview sang Bombo Radyo kay Punong Barangay Danny Villanueva, iya ginpahayag nga madamo nga pribado nga sektor ang nagakadto sa barangay agud magpatigayon sang clean-up drive sa mga mangroves.
Suno sa iya, dako ini nga bulig sa pagpreserbar sang dunang manggad sang ila nga barangay.
Ginpasalamatan man sini si ICPO Director PCol. Wilbert Parilla kag Iloilo Governor Arthur Defensor Jr. bangud sa ila kooperasyon sa mangrove planting activity sa lugar.
Suno pa sa iya nga dako nga bulig para sa ila ang pagtatap sang ila suba bangud man sa alimango nga nagakabuhi diri kag ginahimo man nga pangabuhian sang pila nila ka mga residente.
Nahibaluan nga sang nagligad nga sabado, nagpatigayon man sang “Project Tatap” ang mga miyembro sang ICPO upod ang Iloilo-Acacia Masonic Lodge No. 11 kun sa diin nakatanom ang mga ini sang 200 ka mangrove seedlings bilang kabahin sang reforestation effort.
