Magabayad sang multa nga P5,000 ang driver sang wingvan nga nakasaga-id sang vertical clearance sang Buhang Flyover sa Jaro, Iloilo City sang Dominggo sang gab-i, Mayo 3.
Sa interview sang Bombo Radyo kay Ret. PCol. Uldarico Garbanzos, head sang Iloilo City Traffic Transportation Management Office, iya ginpahayag nga magluwas sa nakumiter nga damage to property, nalapas man ang regulation ordinance bangud indi pwede ang amo nga salakyan nga mag-agi sa flyover.
Suno kay Garbanzos, magahatag sila sang traffic citation ticket bangud sa violation sang Regulation Ordinance 2023-260 sang syudad.
Sa amo nga ordinansa, ginadumilian ang paglabay sang e-trikes, tricycle, pedestrian, bicycle, kag heavy vehicles nga may 3 axles sa flyover.
Base man sa ordinansa, ang sin-o man ang madakpan nga maglapas sa ordinansa ang magapangatubang sang multa nga nagaumpisa sa P500 para sa e-bikes kag non-motorized vehicles, samtang P5,000 naman para sa tricycles kag mga dalagko nga mga salakyan.
