Gilayon nga nagpatigayon sang greyhound inspection ukon surprise inspection ang Bureau of Jail Management and Penology sa Iloilo City District Jail Male Dormitory sa Ungka, Jaro, matapos ang ginpatigayon nga buybust operation kagab-i sa Brgy. Tacas, Jaro.
Ini kasunod sang gintuad sang isa sa mga nadakpan nga ang ila source sang droga amo ang yara mismo sa sulod sang nasambit nga pasilidad.
Sa interview sang Bombo Radyo kay Jail Superintendent Denver Beltran, Jail Warden sang BJMP Ungka, iya ginpahayag nga ginkilala ang ginapahayag source sang droga nga si Ruben De Asis nga may ara pa sang komunikasyon sa nadakpan nga subject sa drug buy bust samtang yara ini sa sulod sang pasilidad.
Suno kay Beltran, gilayon sila nga na-imbestigar kagina sang kaagahon sa mga Persons Deprived of Liberty, apang wala man sang nakit-an nga cellphone halin kay De Asis.
Dugang pa sang natungdan nga magapadayun ang ila imbestigayon sa pasilidad sa bulig man sang CDEU.
