Matapos ang madinalag-on nga pagbukas sang cooling station sa bahin sang Diversion Road sa Mandurriao kahapon nga adlaw, Mayo 6, maga-operate naman sa masunod nga semana ang cooling station sa bahin sang Plazoleta Gay.
Sa interview sang Bombo Radyo kay Engr. Niel Ravena, head sang Iloilo City General Services Office, iya ginpahayag nga na-amat-amat na nila tukod ang structure sang cooling station sa Plazoleta Gay.
Suno kay Ravena, padayon pa ang pag-install sang solar panels kag iban pa nga kagamitan nga kinahanglanon sa sulod sang cooling station.
Nahibaluan nga magluwas nga pwede maka-charge sa sulod sang cooling station may yara man sang mga water dispenser nga ginpahamtang sa lugar kag ginapangabay ang publiko nga magdala sang ila kaugalingon nga tumbler nga gamiton sa ila nga pag-inom.
Suno pa kay Ravena, nagaplano man sang syudad nga magbutang pa sang dugang nga cooling stations sa Ungka Terminal kag sa Buntatala, Jaro agud makaserbisyo sa mga pasahero nga nagahulat sang ila masakyan.
Nahibaluan nga naga-operate ang mga cooling station sa syudad umpisa alas 10 sang aga tubtob alas-4 sang hapon agud makabulig sa mga commuters, elderlies kag iban pa nga residente nga nagakinahanglan sang lugar nga temporary nga masilungan bangud sa tuman ka mainit nga tyempo.
