Ginalimitahan sang Bureau of Jail Management and Penology ang pagpaguwa sang mga Persons Deprived of Liberty (PDL) sa BJMP Ungka Jaro bangud sa tuman ka init nga tyempo.
Sa interview sang Bombo Radyo kay Jsupt. Denver Beltran, Jail Warden sang BJMP Ungka, iya ginpahayag nga ginapauntat ang mga outdoor activities sang mga PDL alas-9 sang aga agud malikawan ang sobra nga epekto sang init sang adlaw.
Suno kay Beltran, may yara sang mga vulnerable nga PDL ukon may existing medical conditions nga kinahanglan bantayan bangud mas mataas ang posibilidad nga ma heat stroke kag iban pa nga mga balatian nga dala sang mainit nga tyempo.
Dugang pa sang jail warden nga padayon ang education campaign sang BJMP kun sa diin ginatudluan ang mga PDL sa proper hydration kag mga pamaagi kon paano malikawan ang heat stroke kag iban pa nga summer-related diseases.
Suno pa kay Beltran, apisar magutok ang pasilidad, ginatinguhaan sang BJMP nga mapadayon ang maayo nga ventilation agud makasulod ang hangin sa sulod sang jail facility.
Dako naman ang ila pagpasalamat sa bulig sang mga medical providers kag organisasyon nga naga-conduct sang medical missions para buligan ang mga PDLs sini nga tuman ka init ang tyempo.
