Ginpa-usisa ni Mayor Raisa Treñas sa Office of the Building Official (OBO) ang ginpahayag sang Metro Pacific Iloilo Water MPIW nga delay sa processing sang ila permit rason nga na delay sang walo ka bulan nga ang pagpatukod sang desalination plant sa sa syudad sang Iloilo.
Sa interview sang Bombo Radyo kay Joy Fantilaga Gorzal, spokesperson ni Mayor Raisa Treñas, iya ginpahayag nga base sa records sang Office of the Building Official , Marso 26, 2026 sang opisyal nga na-file ang ila aplikasyon kag may ara ini sang existing deficiencies nga kinahanglan pa ma-comply.
Suno kay Gorzal nga ang Office of the Building Official nagahatag man sang technical assistance kag nagasunod lamang sa mandatory safety kag building regulations nga indi mahimo laktawan ang proseso.
Ginpahayag man sini nga importante nga dapat mangin patas kag matuod ang paghatag sang impormasyon agud nga mangin klaro ang kooperasyon sang mga ini.
Gindugang pa ni Gorzal nga may ara sang direct communication ang Metro Pacific Iloilo Water kay Mayor Treñas para sa madali nga koordinasyon gane nga dapat nga ginpahibalo siya sa ini nga concern.
Ginpahayag man sini nga ginahandom gid sang alkalde nga madayon ini nga proyekto bangud kabahin ini sang long-term solution sa water supply sang Siyudad, apang dapat masunod and safety, kumpleto nga requirements, kag due process.
Nahibaluan nga Ang amo nga proyekto sang Metro Pacific Iloilo Water nga ginakabig pinakadako nga desalination plant sa Pilipinas ang ginatan-aw nga dako nga bulig agud mahagan-hagan ang epekto sang mga El Niño events sa palaabuton.
Ang planta ang may kapasidad nga magproduce sang 66.5 million liter per day para sa 400,000 nga mga residente sang syudad.
