Wala ginadula sang Bureau of Jail Management and Penology sa BJMP Ungka ang posibilidad nga may kaangtanan man ang ila personnel kun ngaa may mga kontrabando nga nagasulod sa pasilidad.
Sa interview sang Bombo Radyo kay Jsupt. Denver Beltran, Jail Warden sang BJMP Ungka, iya ginpahayag nga mahimo sila sang report sa regional office agud makapatigayon sang imbestigasyon nahanungod sa isyu sang pagpasulod sang mga kontrabando.
Ginpahayag man sang mga opisyal nga padayon sa gihapon ang ila standard operating procedures para mapabaskog ang seguridad sa sulod sang jail facility.
Lakip diri ang random search sa mga bisita kag regular nga inspeksyon sa mga personnel antes makasulod sa pasilidad.
Ginasiguro man sang BJMP nga naga-padayon ang regular nga greyhound operations ukon surprise inspections antes pasudlon ang mga nagakadto sa pasilidad.
