Naglab-ot na sa 215 ka mga myembro sang Kamara ang nagpahayag nga magasuporta sila sa impeachment kay Vice President Sara Duterte.
Suno kay Bicol Saro party-list Rep. Terry Ridon nga chairman of the House committee on public accounts, sandig ini sa ila konsultasyon nga ginpatigayon sa iban nga mga mamalidha.
Kun matuod ini nga pahayag ni Ridon, ini nga numero ang naga-angay sa tally sa una nga impeachment case kay Duterte sang nagligad nga tuig.
Wala pa naghatag sang dugang nga detalye ang kongresista, apang ginsiling sini nga ginapahayag lang niya ang “general numbers.”
Buot silingon sini suno sa iya, masobra na ini sa two-thirds sang tanan nga myembro sang lower chamber kag katumbas na sang kabug-usan nga numero sang boto sa impeachment plenary vote sang 2025.
Una na nga ginpahayag ni House Deputy Speaker Ronaldo Puno sang Myerkules nga indi magnubo sa 180 ka kongresista ang posible magboto pabor sa impeachment ni Duterte.
Sa idalom sang 1987 Constitution, one-third lang sang kabug-usan nga miyembro sang Kamara ang kinahanglan para ma-impeach ang isa ka opisyal.
Nahibaluan nga nagahatagan na ang 318 ka miyembro sang House sang kopya sang 93 ka pahina nga report nga naga-unod sang Articles of Impeachment batok sa bise presidente.
Ang report nga ginpreparar sang House Committee on Justice nga ginapamunuan ni Batangas Rep. Gerville Luistro kinahanglan makabaton sang indi magnubo sa 106 ka boto antes ini mapadala sa Senado para sa pormal nga impeachment trial.
