Pasakaan sang panumbungon nga murder ang barangay kagawad kag ang kaupod sini nga nagbuno-patay sa water delivery boy sa Brgy. Sta. Filomena, Arevalo, Iloilo City.
Ginapreparar na ini sang kapulisan apisar nga nagapabilin pa nga at large ang duha.
Sa interview sang Bombo Radyo kay Police Captain Michael Tuburan, hepe sang Iloilo City Police Station 6, iya ginpahayag nga mangin ang pamilya sang mga suspek ang nagpahayag man nga wala sila sang ihibalo kun sa diin na ang ila nga mga himata.
Matandaan nga ang biktima amo si John Robert Sayno, 28, kag residente sang Sto Domingo, Arevalo.
Ang suspek naman amo sanday Kagawad Melvin Acebuque, residente sang Sta. Felomina, Arevalo; kag Mark Anthony Bañares, residente sanc Brgy. Bonifacio, Arevalo.
Sa inisyal nga impormasyon, matapos ang insidente, nakapuli pa sa ila balay si Bañares, kag may nagaguwa man nga impormasyon nga naga-angkasanay pa sila nga duha sang nalagyo.
Nauna naman nga nagpahayag si Punong Barangay Fredo Avanceña nga sa iya opinyon, posible nga wala na sa ila nga barangay ang kagawad bangud madamo man ini sang abyan.
Sa inisyal nga pagpangusisa sang pulis, nagaguwa nga may kumprontahanay nga natabo bangud ginpahayag nga ginsukmaan ni Acebuque si Sayno nga nagpangawat.
Nahibaluan nga ang kagawad nga nangbuno amo man ang chairman sang Committee on Peace and Order sa barangay.
Base sa ila punong barangay, pareho ang kagawad kag ang biktima nga wala sang malain nga record sa ila lugar, apang nagapati siya nga posible may madalom gid nga ginhalinan ang ila away.
