Nagapati ang isa ka abogado nga nadulaan na sang pagsalig si former President Rodrigo Roa Duterte kay Atty. Nicholas Kaufman rason nga nag-atras na ini bilang legal counsel sa kaso sang anay presidente sa International Criminal Court (ICC).
Sa interview sang Bombo Radyo kay Atty. Joebert Pahilga, iya ginpahayag nga isa ka universal practice nga kun wala na sang salig ang kliyente sa iya nga abogado, mahimo niya nga ma-terminate ang serbisyo sini kag magkuha sang bag-o.
“It’s the right of the former president to choose who his counsel would be,” suno kay Pahilga. “Indi pwede maghambal ang abogado nga indi siya pwede maislan tungod ang relationship sang lawyer and client is based on trust and confidence. If the client is not anymore confident with the services of the counsel, then at any time, pwede maislan ang abogado.”
Sa request ni Kaufman sa Trial Chamber sang ICC, ginsiling sini nga ang iya engagement para nga mag-represent kay Duterte ang nagtapos na sang Marso 31, 2026, kag sunod man ini sa desisyon ni Duterte nga magkuha sang bag-o nga abogado nga amo ang maga-represent sa iya sa trial.
Pahayag pa ni Pahilga, nagapati man siya nga wala naman sang mangin delay sa schedule kaangot sa trial.
Ini bangud santo sa pasalig ni Kaufman sa iya nga request, handa ang bag-o nga counsel nga magbulos sang representasyon kag handa man ini nga magtambong sa status conference sa Mayo 27.
Ginsigurado man ni Kaufman nga magapadayon kag magapabilin nga sigurado ang legal representation kay Duterte sa kamot sang bag-o nga counsel kag iban pa nga nabilin sa defense team.
𝗜𝗡𝗗𝗜 𝗡𝗔 𝗚𝗜𝗗 𝗕𝗔𝗟𝗔 𝗠𝗔𝗦𝗔𝗥𝗔𝗡𝗚𝗔𝗡 𝗡𝗚𝗔 𝗗𝗘𝗣𝗘𝗡𝗦𝗔𝗛𝗔𝗡 𝗦𝗜 𝗗𝗨𝗧𝗘𝗥𝗧𝗘?
Kasunod sang pagbiya ni Kaufman kag sang iya associate counsel nga si Dov Jacobs, may nagasiling nga indikasyon ini nga indefensible na ang kaso ni Duterte ukon indi na masarangan nga depensahan sa korte.
Apang paathag ni Atty. Pahilga, indi ini mahimo nga gamiton nga ground sang abogado agud nga magbalibad ukon mag-withdraw sa kaso.
Ginbalikan sini ang universal principle nga gina-presume nga inosente ang akusado kag dapat anay nga hatagan sang due process.
“Whether the case in indefensible or not, whether madaog or ma-convict, it’s up to the court and would be based on evidence. As of now, premature kun hambalon nga indefensible,” suno kay Pahilga.
Dugang sini, apisar nakit-an na sang publiko ang mga natabo sa confirmation of charges sa Pre-Trial Chamber I sang Pebrero, may daku nga kinalain sa trial bangud iplastar na ang ebidensya, may grounds sa objection, kag nakadepende sa korte kun i-admit ang mga ebidensya.
“The withdrawal of Atty. Kaufman, I think, is not based on the fact nga indi ya kaya nga i-depensa si Mr. Duterte. In fairness to Atty. Kaufman, ginhimo ya ang tanan to defend, only that wala lang siya ginpanigan sang ICC. And I think Mr. Kaufman enjoyed being the lawyer of the former president because of the limelight,” suno kay Pahilga.
Nahibaluan nga ang request ni Kaufman nga mag-withdraw ang subject pa para sa approval sang ICC Trial Chamber III nga amo ang korte nga magauyat sang three counts sang crimes against humanity case batok kay Duterte.
Si Kaufman nga isa ka British-Israeli lawyer amo ang nagtiglawas kay Duterte halin sang gindakop siya sa Pilipinas sang Marso 11, 2025 tubtub nga na-release na ang ruling sang ICC Appeals Chamber sa ila challenge to jurisdiction sang nagligad nga Abril.#
