Ginpakigabahin sang isa ka iloy nagikan sa San Joaquin, Iloilo kag sa karon masobra 20 ka tuig na nga OFW sa Kuwait ang mga kabudlayan sini nga naagyan sa luwas sang pungsod kag sa karon nagbunga na sang matam-is nga kadalag-an.
Sa interview sang Bombo Radyo kay Lilibeth Sandiego, iya ginpahayag nga masakit man sa iya nga bayaan ang iya mga kabataan agud makapangita sang obra sa luwas sang pungsod, wala ini nagpugong sa iya agud nga madala kag mahatag sa iya pamilya ilabi na sa iya pinalangga nga mga kabataan ang matalunsay nga kabuhi.
Suno pa sa iya nga nagbiya ini sa Pilipinas samtang 9 months old pa lamang ang iya pinakabata nga anak bangud sa handom nga mahatagan sang maayo nga buwas damlag kag mapatapos ang iya mga kabataan sa ila nga pag-eskwela.
Suno pa sa iya nga apisar mabudlay kag masakit para sa isa ka iloy nga mapalayo sa iya mga bata, gin-antos sini ang tanan nga kahidlaw kag kasubo para lamang sa ila palaabuton.
Bangud sang iya pagpaninguha kag sakripisyo, napatapos sini ang iya walo ka kabataan sa kolehiyo.
Ginpahayag sini nga tuman ang iya pagpasalamat sa Diyos bangud nga ginbugayan ini sa kusog kag kabakod agud nga makapadayon kag matuman sini ang iya ginahandom sang una.
Suno pa kay Nanay Lilibeth nga maayo na lamang bangud wala gin-uyangan sang iya mga kabataan ang oppurtunidad nga tapuson ang ila pagtuon bangud suno pa sa iya nga isa ini ka regalo para sa ila manami nga buwas damlag.
