Gin-athag sang isa ka legal expert nga indi absolute ang ginhatag sang senado nga protective custody kay Senator Ronald dela Rosa.
Ini kasunod sang pagdagdag na sang International Criminal Court sang arrest warrant batok sa senador.
Sa interview sang Bombo Radyo kay Atty. Noel Palomado, isa ka Bombo Abogado, iya ginpahayag nga may limitasyon ang protective custody nga ginhatag sang Senado bangud nga mabug-at ang penalidad sa kaso ni Bato nga crime against humanity.
Suno kay Palomado, base sa konstitusyon, may parliamentary immunity ang senador kag indi indi mahimo nga dakpon kun minor offense lang ang kaso ni Bato nga anom ka tuig ukon panubo lang ang silot nga pagkapreso.
Apang, suno sa abogado, bangud nga ang silot sa kaso nga crime against humanity ang nagalawig sang 30 ka tuig pataas, indi na magamit ang immunity kag mahimo gid nga dakpon si dela Rosa.
Maathag man suno kay Palomado ang nasaad sa RA 9851 nga nagakilala sa warrant nga gina-isyu sang international tribunal kag kun valid ini, mahimo gid nga i-surrender sang gobyerno sang Pilipinas ang subject sang warrant.
Dugang ni Palomado, sa subong, ang sarang mahimo ni Bato amo ang magdangop sa Supreme Court kag magpangayo sang Temporary Restraining Order ukon TRO.
