Napirmahan na ni Iloilo City Mayor Raisa Treñas ang memorandum of agreement kaupod ang Department of the Interior and Local Government Region VI may kaangtanan sa P750,000 cash incentive nga pagabatunon sang Iloilo City Government.
Ini matapos nga ang syudad sang Iloilo ang ginkilala bangud sa programa sini nga Sustainable Income Generation through Entrepreneurship ukon SIGE Asenso Program.
Sa interview sang Bombo Radyo kay Joy Fantilaga Gorzal, spokesperson ni Mayor Raisa Treñas, ginpahayag sini nga may ara sila sang programa nga naga-focus sa community-based livelihood opportunities para sa mga homeowners association kag iban pa nga housing programs sa syudad.
Kabahin sa amo nga programa ang pagbulig sa 30 ka mga kababainhan halin sa housing program sa So-oc, Arevalo, Iloilo City pinaagi sa ila hablon weaving program nga ila pangabuhian.
Suno sa City Government, ang cash incentive nga ila pagabatunon ang ila pagagamiton para sa pagpatindog sang weaving production facility sa syudad.
Ginalauman nga pinaagi sa nasambit nga pasilidad, indi lamang ang 30 ka benepisyaryo ang mabuligan kundi mapalapnag pa gid ang hablon weaving sa komunidad kag mapreserbar ang lokal nga kultura kag pangabuhian.
Nagpasalamat man ang Iloilo City Government sa DILG Region VI bangud sa suporta kag pagkilala sa ila programa nga nagahatag sang dugang nga oportunidad para pumuluyo sang syudad.
