Nagapati ang isa ka abogado nga ang natabo nga kinagamo sa senado sang nagligad nga gab-i Mayo 13 kun sa diin may linukpanay pa sang pusil nga natabo ang dapat may ara gid sang may manabat.
Sa interview sang Bombo Radyo kayAtty. Rodel A. Taton, DCL, Dean sang Graduate School of Law sang San Sebastian College–Recoletos sa Manila, iya ginpahayag nga kun may ara man sang biktima sa kinagamo nga nagluntad sa senado ini amo ang mga Pilipino nga nagalantaw kag naga-obserbar.
Suno pa sa iya nga kun isipon madali lamang kuntani mahibaluan kun sin-o ang sa likod sang nagpalupok sa sulod sang senado bangud may mga CCTV nga ginbutang didto nga ginbayran sang publiko agud mangin basehan apang wala nakabulig bangud may nagpapatay.
Ginpunto man sini ngaa wala nabatyagan sang mga senador nga ato didto ang kahadlok kun sa diin may ara sang natabo nga simultaneous nga pag-live sa ila mga Facebook page.
Nahibaluan nga sang gab-i nga natabo ang komosyon sa Senado halos tanan nga mga senador sa majority bloc kaangay nanday Senate President Alan Peter Cayetano upod ang iya utod nga si Senator Pia Cayetano, amo man si Sen. Bong Go, Sen. Imee Marcos kag Sen Mark Villar ang nagpatigayon sang live nga suno pa kay Atty. Taton bilang isa ka ordinaryo nga Pilipino mahibaluan mo gid nga indi kuntani nagakadapat sa amo nga sitwasyon.
